مقام سيدي "الفيس بوك"

من طرف مستر مهند الثلاثاء 07 أغسطس 2012, 5:16 am

لم يكن بيومي
أفندي يتوقع يومًا أن يكون محللاً سياسيًّا من طراز فريد، وهو الرجل الذى
عاش حياته لا يتكلم في السياسة ولم يتفوه لسانه بكلمة واحدة من مفرداتها،
مع أنه ولد في عهد فاروق وشب في عهد عبد الناصر وصار رجلاً له وزنه في عهد
السادات وهرم في عهد مبارك وصار له عدد لا بأس به من الأحفاد.. وها هو يعيش
في عهد الثورة الجديدة..

جلس معه أحد أحفاده ذات يوم من أيام ما بعد الثورة ودار بينهما حديث طويل..

قال له حفيده: لقد شبعنا منك سخرية واستهزاء عندما كنا نجلس
أمام الفيس بوك ولقد رأيت بعينك الدور العظيم الذي قام به الفيس بوك في
الثورة.

قال الجد: ربنا يخلي لنا الفيس بوك يا ولدي.

قال الحفيد: رجعنا مرة ثانية للاستهزاء (مفيش فايدة).

قال الجد: من قال ذلك ولكن يا ولدي لكل مقام مقال... وعلى حد
كده يُشكر الفيس بوك.. ولا انتم عاوزين نبني للفيس بوك مقام وعليه قبة
ونعمله مزار والناس تروح تزوره كل سنة يوم 25 يناير.. ونسميه سيدي الفيس
بوك..

قال الحفيد: يا خبر أسود أنت عاوز السلفيين يولعوها نار.. هي ناقصة.

الجد: بس الفكرة دي هتعجب الصوفيين.. ولكن ما اعرفش ايه رأي اللبراليين في الموضوع ده.

الحفيد: الموضوع شائك ومحير يا جدي بس اعتقد أن الليبراليين
هتكون لهم آراء متنوعة وكثيرة حول الموضوع وربما يظهر عشرين تلاتين ائتلاف
ما بين مؤيد ومعارض ومتعاطف مع الموضوع... ولكن مش عارف إيه اللي هيعمله
الإخوان فى موضوع مقام سيدي الفيس بوك.. وخاصة إنهم أصبحوا أغلبية..

الجد: أنا شايف أن الإخوان في الموضوع ده هيعملوا ودن من طين وودن من عجين يعني كأن مفيش موضوع مثار على الساحة وشاغل الناس.

الحفيد: والله يا جدي إنت لفتّ نظري لنقطة مهمة وقضية كبيرة..
ايه رأيك هأعمل جروب على الفيس بوك واسميه سيدي الفيس بوك.. وهأعمل جروب
تاني واسميه أعداء سيدي الفيس بوك.. وأشوف في النهاية إيه النتيجة ومين
هيعمل (لايك هنا ومين هيعمل لايك هنا).. ياااااي فكرة جنان.. أنت يا جدو
مفجر أفكار آى والله..

الجد: يا بني الدهن في العتاقي.. وده موضوع يشغل الناس شوية
ويريحنا من القرف ويخللي الست منى الشاذلي تلاقي حاجة تتكلم فيها وتستضيف
واحد سلفي على واحد صوفي وتشرب مع كل واحد واحد شاي، والست جيهان منصور
تلعلع وعمك توفيق عكاشة يتنرفز، والمعلم خيري رمضان يتكلم ويقسّم والأسطى
عمرو أديب يصهلل والمسلماني يرسم خرايط ويحلل والجزيرة تاكل عيش.. وربك
يرزق من يشاء بغير حساب..

الحفيد: الله عليك يا جدو يا رايق يا لعيب دا أنت ولا جدو بتاع الكورة..

الجد: وتخيل بقى لو فيه ناس راحت كسرت مقام سيدي الفيس بوك وهدمت القبة عليه.. الموضوع هيولع أكتر وأكتر..

الحفيد: أنا مش عارف أقول ايه يا جدو أفكارك، راااائعة وحاجة اورجينال خالص ودي فكرة هتكسر الدنيا..

الجد: ويا ريت يا بني تستعرض آراء المرشحين لرئاسة الجمهورية
حول الموضوع، ومين معاه ومين ضده وإيه اقتراحات كل واحد حول موضوع مولد
سيدي الفيس بوك.

ومفيش مانع كمان نخللي القضية عالمية ونستطلع آراء الدول
الصديقة والمعادية حول الموضوع وموقف إخواننا العرب ومين اللى هيدعم هنا
ومين اللى هيدعم هنا..

الحفيد: أنا مش مصدق يا جدو والله العظيم انت فيييّيس كبييير..
وكنت بتقول قبل كده أنك ما بتحبش الفيس بوك، يااااجامد.. يااااا جاااااامد.

الجد: وجايز يا بنؤ عمك الدكتور البرادعى ربنا يهديه لما يشوف
القضية الخطيرة دي على الساحة، ويتراجع عن الانسحاب من سباق الرئاسة..
ويرجع تاني ويسيبه من موضوع التنحي ده.. وشعبان عبد الرحيم يغنى له: هاش
هاش البرادعي ما تنحاش إييييييه إيييييه.. وبالمرة عمك حازم أبو إسماعيل
يتحمس شوية لأني شايفة الأيام دي صوته خافت وأنا متأكد إن الموضوع ده
هيشجعه ويخليه يلعلع وصوته يعلى.. وعمك أبو الفتوح هيدعو إلى التوافق
وتقارب وجهات النظر.. وعمك عمرو موسى يعمل كام مؤتمر صحفي حول الموضوع.

الحفيد: الكلام كده هيتنسى انا هافتح اللاب توب وأسجل وراك يا جدو خلاص إنت بتفجر أفكار..

الجد: بس ما سألتنيش يا ولدي أمريكا هيكون إيه رأيها؟

الحفيد: يا سلام يا جدو ما تفوتك حاجة..

الجد: الست كلينتون هتطلع في مؤتمر صحفي آخر انبساط وتقول: لقد
أصبحت مصر على بعد أمتار من الديمقراطية الحقيقية وأنا سعيدة جدًّا بهذا
الحراك السياسي. وطبعًا الصهاينة هيكونوا آخر زأططة لأن شريكتها مصر في
عملية السلام أصبحت تسير في الاتجاه الصحيح ..

الحفيد: والله يا جدو أنت عظيم وسياسى كبير.. مش برضه يا جدي الكلام ده كله سياسة..

الجد: طبعا يا بني هي دي السياسة الحقيقة وانا أسمي هذا الكلام الغشم السياسي.. وإن شئت يا بني سميتها الحمورية السياسية..

الحفيد: الله يا جدو.. مصطلح جديد.. غشم سياسي.. حمورية
سياسية.. الحمد لله أنا بقيت غشيم سياسى كبير.. و...و....و... أقول ايه يا
جدو من حمورية سياسية

الجد: قل: حمار سياسي .. إنت يا بني بقيت حماااااار سياسي

أما مصر يا حبيبي فربنا يتولاها وعليه العوض ومنه العوض.. عملنا
الثورة عشان نبني وبقينا نهدم، عملنا الثورة عشان نمنع الظلم وبقينا نظلم،
عملنا الثورة عشان نحمي دمنا وأعراضنا وبقينا نقتل ونهتك الأعراض.. عملنا
الثورة عشان نبطل تصريحات وكلام ونتفرغ شوية للعمل بقينا بنتكلم بس وما
بنعمل أي شيء، إيه الحكاية يا ولاد بلدي... ويا ريت حد يكون فاااهم أنا
عاوز اقول ايه!!

(عذرًا على استخدام العامية فالحمورية السياسية لا يصلح لها إلا هذا).